ИЙЭҔЭ МАХТАЛ
Киһиэхэ күндүттэн күндүтэ
Ийэтэ тапталлаах киһитэ,
Ийэҕэ махталы аныахха
Эҕэрдэ бастыҥын этиэххэ.
Ийэбит кыһаллар биһиэхэ
Тапталын биллэрэр күннэтэ,
Арчылыыр,арыаллыыр аймана
Долгуйа кэтэһэр боруокка.
Олохпут устатын тухары
Ийэбит иһигэр сылдьабыт,
Сүрэҕин сорҕото буолабыт
Дьолунан умайа кыыһабыт.
Ийэбит дьиэтигэр өрүүтүн
Төннөммүт сылааһы уунуохха,
Сибэкки дьөрбөтүн бэлэхтээн
Ийэҕэ үөрүүнү үксэтиэх.
Ийэни таптыахха истиҥник
Өрүүтүн болҕомто ууруохха,
Иэйиилээх тылынан хоһуйан
Ийэбит мөссүөнүн сырдатыах.
Инна Николаева.Майа.17.10.20с
ИЙЭҔЭ МАХТАЛ Инна Николаева тылл, Елена Нам-Чы мел, тол.
П. Григорьев аранж, А.Потапов студията
***
АҔАБЫНАН КИЭН ТУТТАБЫН
Аҕалаах буолар дьол
Аҕам үөрэтэр элбэххэ,
Тулуурдаах буоларга
Толлубат санааҕа.
Хорсуннук туттарга
Бэргэнник ытарга,
Оннооҕор сымсатык
Үрэххэ харбыырга.
Кыаммакка, кыраҕа
Көмөлөөх буоларга,
Суһаллаах быһыыга
Бэлэмнээх буоларга.
Дьаныардаах дьарыгы
Дьаныһан буларга,
Дьоҕурдаах билиини
Дьүөрэлии тутарга.
Сатабыл сиэринэн
Санааны ситэргэ,
Саргылаах олоҕу
Сырдата сылдьарга.
Аҕабар махталым
Муҥура биллибэт,
Кэскиллээх олоххо
Эрэлим кытаанах.
Инна Николаева Майа
«Таммахтар»
***
МИН АҔАМ
Мин аҕам үлэһит
Идэтинэн дьиэ тутар,
Элбэх дьиэни чочуйан,
Кэрэһэлии дьэндэттэ.
Суоруллубут мастарын
Эрээтинэн уурталыыр,
Түннүктэрин, ааннарын
Эрдэтинэ бэлэмниир.
Сатабылын тутуһан
Мээрэй маһын туһанар,
Муннуктарын аайытын
Сурааһыны түһэртиир.
Соторунан саҥа дьиэ
Үүнэн тахсыа олбуорга,
Сырдыгынан сыдьаайыа
Дьон үөрүүтэ үксүөҕэ.
Инна Николаева Майа
«Таммахтар»
***
АҔАЛАР КҮННЭРЭ
Ийэ сири көмүскээн,
Ытык иэһи толорон
Аҕалаах буоламмыт
Эрэлинэн кыыһабыт.
Эҕэрдэбит бастыҥын
Махталбытын этэбит,
Аҕаларбыт биһиэнэ
Хорсун хотой саллааттар.
Күүстээх ырыа дьиэрэйэр
Аҕаларга бэлиэ күн,
Аҕа дойду көмүскэлин
Айхаллыыбыт уруйдаан.
Инна Николаева Майа
«Таммахтар»
