Былыргы олоҥхо үөскээбит ньууруттан,
Бараммат баай тылбыт хааһахтан оронор
Боотурдар кистэлэҥ күүстэрэ хоһуллар,
Быйаҥнаах айылҕа оһуордуун аһыллар.
Ийэ тыл барахсан дьалкыйар долгуннаах
Илбистээх күүһүнэн абылыыр алыптаах,
Ийэлии сып- сылаас эйэҕэс дьайыылаах,
Иһирэх кэпсээннээх, дьиктилээх сэһэннээх.
Төрүт тылым барахсан хааммынан сүүрэҕин
Төлкөбөр, удьуорбар кутуллан тиийэҕин,
Төрүт тыл — ийэ тыл мин баайым, сүрэҕим,
Төрөөбүт тылбынан тыыннаахпын дэнэбин.
Сахалар баай талым тылбытын харыстаан
Сахалыы көҥүллүк саҥарар дьоллоохпут,
Балысхан сайдыылаах олоххо сыппаамыах,
Бүттүүнүн турунан тылбытын көмүскүөх!
Инна Николаева Майа
«Таммахтар»