Ыалдьыттаан кэлиэхпин өтөхпөр
Ыллыгым оспута ырааппыт,
Ийэбэр күүлэйдии барыахпын,
Түннүгэ — үөлэһэ сааллыбыт.
Саныыбын өрүүтүн ийэбин
Мичээрбит мөссүөнүн ахтабын,
Имигэс илиитин бу баардыы,
Илиибэр ыксары кууһабын.
Бу сиргэ ийэкээм аттыбар
Мэлдьитин арчылыыр билэбин,
Моһоллоох суоллары туоратар,
Болоорхой ыллыкпын сырдатар.
Олохпор мин ийэм сүрэхпэр
Сүппэттии сылааһы угуттуур,
Ийэкээм иһирэх таптала
Олоҕум суолугар арыаллыыр.
Ийэбэр мин аны тиийбэппин
Олбуорун арыйан киирбэппин,
Сабыылаах барыта хатыылаах,
Ийэкээм букатын бардаҕа…
Чуҥкуйан иэйиибэр ылларан
Оҕолуу кистээммин ытыыбын,
Ийэбэр тыыннааҕар эппэтэх,
Тылларым ис куппун аймыыллар…
Инна Николаева Майа
«Таммахтар»
